Ali təhsil müəssisələrinə qəbul imtahanlarının nəticələri açıqlanıb. III ixtisas qrupu üzrə ən yüksək nəticəni Sumqayıt şəhər 12 nömrəli tam orta məktəbin məzunu Fidan Hüseynzadə göstərib.

Sumqayit.tv Lent.az-a istinadən xəbər verir ki, abituriyent qəbul imtahanının hər iki mərhələsinin yekun nəticəsinə əsasən 690 bal toplayaraq ölkə birincisi olub. O, imtahanın birinci mərhələsində 293,8, ikinci mərhələsində isə 396,2 bal əldə edib.

Fidan Hüseynzadə gələcəkdə hüquqşünas olmaq istədiyini bildirib. O, nəticələrin yüksək olacağını gözləsə də, ölkə üzrə ən yüksək nəticəni göstərəcəyini düşünmədiyini deyib.

Abituriyentin sözlərinə görə, IX sinifdən etibarən hazırlıqlara başlayıb. Məktəb illərində daim fərqlənən şagird olub və dərslərinə xüsusi diqqət ayırıb. O, boş vaxtlarında əsasən kitab oxumağa üstünlük verdiyini qeyd edib.

Fidan Hüseynzadə gələcək hədəfinin peşəkar mütəxəssis kimi ölkəsini layiqincə təmsil etmək və magistratura təhsili almaq olduğunu vurğulayıb. O, qazandığı uğurda məktəb və hazırlıq müəllimlərinin böyük əməyi olduğunu bildirib.

Bu gün, 01:36 8