Sumqayıt şəhərinin 45-ci məhəlləsində yerləşən uşaq əyləncə meydançası ilə bağlı sakinlər redaksiyamıza müraciət ediblər.

Sakinlərin Sumqayit.tv-yə bildirdiyinə görə, məhəllədə yaxın vaxtlarda quraşdırılmış yeni yelləncəklər və oyun avadanlıqları qısa müddət sonra yararsız vəziyyətə salınıb. Bildirilir ki, oyun qurğuları indiyədək iki dəfə təmir olunsa da, yenidən zədələnib.

Müraciətdə qeyd olunur ki, bəzi şəxslərin məsuliyyətsiz davranışı nəticəsində uşaqlar üçün nəzərdə tutulmuş avadanlıqlar sıradan çıxarılır. Bu isə həm azyaşlıların təhlükəsizliyi, həm də onların asudə vaxtının səmərəli təşkili baxımından ciddi problem yaradır.

Sakinlər aidiyyəti qurumları məsələyə diqqət yetirməyə, eyni zamanda ictimai əmlaka qarşı daha məsuliyyətli münasibətin formalaşdırılması istiqamətində tədbirlərin görülməsinə çağırırlar.

Qeyd edək ki, uşaq meydançaları və digər ictimai istifadə obyektlərinin qorunması hər bir vətəndaşın üzərinə düşən məsuliyyətlərdən biridir. Belə avadanlıqların qəsdən zədələnməsi həm dövlət vəsaitinin itirilməsinə, həm də sakinlərin rahatlığının pozulmasına səbəb olur.

16-06-2026, 18:59 95