Azərbaycan xalqının müasir tarixində mühüm yer tutan 15 İyun – Milli Qurtuluş Günü dövlətçiliyimizin qorunması, müstəqilliyimizin möhkəmləndirilməsi və ölkəmizin gələcək inkişaf yolunun müəyyənləşdirilməsi baxımından xüsusi əhəmiyyətə malikdir. Bu əlamətdar tarix yalnız siyasi hadisə deyil, həm də Azərbaycan xalqının milli birlik, həmrəylik və dövlətçilik iradəsinin təcəssümüdür.
XX əsrin sonlarında Sovet İttifaqının dağılması ilə Azərbaycan yenidən müstəqilliyini bərpa etsə də, ölkə çox mürəkkəb və çətin bir dövr yaşayırdı. Ermənistanın Azərbaycana qarşı hərbi təcavüzü nəticəsində torpaqlarımız işğal olunur, cəbhədə vəziyyət ağırlaşır, ölkə daxilində isə siyasi qarşıdurmalar, hakimiyyət böhranı və iqtisadi tənəzzül hökm sürürdü. Dövlət idarəçiliyindəki zəiflik, qanunsuz silahlı dəstələrin fəaliyyətləri və mərkəzi hakimiyyətə inamsızlıq Azərbaycanı vətəndaş qarşıdurması və dövlət müstəqilliyinin itirilməsi təhlükəsi ilə üz-üzə qoymuşdu.
Belə bir ağır şəraitdə xalqın yeganə ümidi böyük dövlət xadimi Heydər Əliyev idi. Ulu Öndərin zəngin idarəçilik təcrübəsi, siyasi uzaqgörənliyi və xalq arasında qazandığı nüfuz ölkənin xilası üçün əsas amil kimi qəbul edilirdi. Azərbaycan xalqının təkidli tələbi ilə Heydər Əliyev 1993-cü ildə Bakıya qayıtdı və 15 iyun tarixində Azərbaycan Respublikası Ali Sovetinin Sədri seçildi. Məhz həmin gün ölkəmizin tarixində dönüş nöqtəsi oldu və sonradan Milli Qurtuluş Günü kimi qeyd edilməyə başlandı.
Heydər Əliyevin hakimiyyətə qayıdışından sonra ölkədə ictimai-siyasi sabitliyin təmin olunması istiqamətində mühüm addımlar atıldı. Dövlət çevrilişi cəhdlərinin qarşısı alındı, qanunçuluq bərpa edildi, dövlət idarəçiliyi gücləndirildi və ölkənin parçalanması təhlükəsi aradan qaldırıldı. Azərbaycanın müstəqilliyinin dönməz xarakter alması məhz bu dövrdə mümkün oldu.
Milli Qurtuluşun yaratdığı sabitlik iqtisadi sahədə də mühüm nəticələr verdi. Ölkədə bazar iqtisadiyyatına keçid sürətləndirildi, xarici investisiyaların cəlb olunması üçün əlverişli şərait yaradıldı. 1994-cü ildə imzalanan və Azərbaycanın iqtisadi inkişafında mühüm rol oynayan “Əsrin müqaviləsi” ölkəmizin dünya enerji bazarına inteqrasiyasını təmin etdi. Sonrakı illərdə həyata keçirilən irimiqyaslı enerji və infrastruktur layihələri Azərbaycanın regionun aparıcı dövlətlərindən birinə çevrilməsinə zəmin yaratdı.
Ulu Öndər Heydər Əliyevin müəyyən etdiyi dövlətçilik strategiyası nəticəsində Azərbaycan beynəlxalq arenada öz mövqeyini möhkəmləndirdi, xarici siyasətdə balanslı və milli maraqlara əsaslanan kurs formalaşdırıldı. Respublikamız nüfuzlu beynəlxalq təşkilatların etibarlı tərəfdaşına çevrildi və dünya birliyində layiqli yerini tutdu.
Bu gün Azərbaycan Respublikasının Prezidenti cənab İlham Əliyev tərəfindən Ulu Öndərin siyasi kursu uğurla davam etdirilir. Son illərdə əldə olunan sosial-iqtisadi nailiyyətlər, ölkəmizin beynəlxalq nüfuzunun daha da artması, müasir infrastrukturun qurulması və ən əsası, Azərbaycanın ərazi bütövlüyünün və suverenliyinin tam bərpa olunması Milli Qurtuluş ideyalarının təntənəsinin bariz nümunəsidir.
15 İyun – Milli Qurtuluş Günü hər bir azərbaycanlı üçün sadəcə tarixi hadisə deyil, həm də dövlətçilik dərsi, milli həmrəyliyin və güclü liderliyin əhəmiyyətini göstərən bir tarixdir. Bu gün xalqımızın birliyini, dövlətimizə sədaqətini və müstəqilliyimizin əbədi olduğunu bir daha nümayiş etdirir.
Milli Qurtuluş Günü Azərbaycan dövlətinin keçdiyi şərəfli yolun, xalqımızın mübarizliyinin və gələcəyə inamının simvoludur. Bu əlamətdar gün münasibətilə bütün Azərbaycan xalqını ürəkdən təbrik edir, ölkəmizə əmin-amanlıq, davamlı inkişaf, firavanlıq və yeni uğurlar arzulayırıq. Qoy Milli Qurtuluşun işığı daim Azərbaycanı daha böyük zəfərlərə və nailiyyətlərə aparsın.
15 İyun – Milli Qurtuluş Günümüz mübarək! Fərid Səmədov YAP fəalı
Bu gün, 18:51
43
