Azərbaycan Respublikasının Prezidenti İlham Əliyevin iştirakı ilə Sumqayıtda yeni tullantı sutəmizləyici qurğunun tikintisini nəzərdə tutan layihə üzrə Kredit sazişi imzalanıb.

Sumqayit.tv xəbər verir ki, saziş Prezident İlham Əliyevin iyunun 18-də Ərəb Koordinasiya Qrupuna daxil olan üzv qurumların rəhbərlərindən ibarət nümayəndə heyəti ilə keçirdiyi görüşdən sonra rəsmiləşdirilib.

Bununla yanaşı, Azərbaycan Respublikasının İqtisadiyyat Nazirliyi, Azərbaycan Dövlət Su Ehtiyatları Agentliyi və Ərəb Koordinasiya Qrupunun üzvləri arasında "Abşeron yarımadasında 33 yaşayış məntəqəsinin su təchizatı və kanalizasiya sistemlərinin tikintisi layihəsi üzrə əməkdaşlığın genişləndirilməsinə dair Anlaşma Memorandumu" da mübadilə olunub.

Sənəd Abşeron yarımadasında su təchizatı və kanalizasiya infrastrukturunun inkişafına, o cümlədən Sumqayıt şəhərində tullantı sularının təmizlənməsi sisteminin müasirləşdirilməsinə töhfə verməyi hədəfləyir.

Qeyd edək ki, layihənin həyata keçirilməsi Sumqayıtın ekoloji vəziyyətinin yaxşılaşdırılması, ətraf mühitin qorunması və şəhərin su-kanalizasiya infrastrukturunun müasir tələblərə uyğun inkişafı baxımından mühüm əhəmiyyət daşıyır.

18-06-2026, 14:22 159