Bakıda keçirilən İslam İnkişaf Bankı Qrupunun 2026-cı il üzrə İllik Toplantılarının açılış mərasimində çıxış edən Prezident İlham Əliyev Azərbaycanda siyasi, iqtisadi və sosial sabitliyin təmin olunduğunu bildirib.

Sumqayit.tv xəbər verir ki, Dövlət başçısının sözlərinə görə, Azərbaycanın müstəqilliyinin ilk illəri işğal, müharibə və humanitar fəlakətlərlə yadda qalıb. Sonrakı dövrdə isə ölkədə sabit inkişafın əsası qoyulub.

"Çünki sabitlik pozulduğu zaman biz inkişafdan danışa bilmərik. Ona görə siyasi, iqtisadi, sosial sabitlik Azərbaycanın bugünkü reallığıdır", – deyə Prezident vurğulayıb.

İlham Əliyev qeyd edib ki, bu sabitlik Azərbaycanın regional və qlobal səviyyədə mövqelərinin güclənməsinə də şərait yaradıb. Onun sözlərinə görə, Azərbaycan bu gün müxtəlif sahələrdə güclü əlaqələrə malik mühüm iştirakçıya çevrilib.