“Hantavirus insanlar üçün COVID-19 qədər təhlükə yaratmır”.

Sumqayit.tv xəbər verir ki, bunu rusiyalı tibb elmləri namizədi, Perm Milli Tədqiqat Politexnik Universitetinin baş elmi işçisi Valeri Litvinov “RİA Novosti”yə müsahibəsində bildirib.

Alimin sözlərinə görə, koronavirus insandan insana çox sürətlə və minimal təmasla ötürülür. Hantavirus isə əsasən təbii ocaqlı infeksiya hesab olunur və heyvanlarla əlaqəlidir.

“Virusun əsas daşıyıcıları siçan və siçovullardır. Onlar xəstəliyi əksər hallarda simptomsuz keçirirlər”, – deyə Litvinov qeyd edib.

Bildirilib ki, gəmiricilər yalnız bəzi hantavirus növlərinə yoluxduqda tələf olurlar. İnsanlarda isə xəstəlik əksər hallarda ağır formada keçmir.

Qeyd edək ki, mayın 10-da İspaniyada göyərtəsində hantavirus epidemiyası qeydə alınan “MV Hondius” kruiz gəmisindən sərnişinlərin təxliyəsinə başlanılıb. İlk mərhələdə 14 ispaniyalı sərnişin Madriddəki xəstəxanalara yerləşdirilib.

İspaniya Səhiyyə Nazirliyi həmin şəxslərdə infeksiya əlamətlərinin müşahidə olunmadığını açıqlasa da, daha əvvəl gəmidə yoluxma halları qeydə alınıb və üç sərnişinin öldüyü bildirilib.