2025-ci ildə bütün dünyada milyonerlərin sayı rekord səviyyədə artıb.

Sumqayit.tv Oxu.az-a istinadən xəbər verir ki, bu barədə İsveçrənin UBS bankının hesabatına istinadən "Reuters" məlumat yayıb.

Hesabata əsasən, ötən il qlobal şəxsi kapitalın ümumi həcmi 10,8 faiz artıb. Müqayisə üçün qeyd olunur ki, bu göstərici 2024-cü ildə 4,6 faiz, 2023-cü ildə isə 4,2 faiz olub. Mütəxəssislər artımı əsasən güclü maliyyə bazarları ilə əlaqələndirirlər.

Məlumata görə, təkcə ABŞ-də 2025-ci il ərzində 440 min yeni dollar milyoneri qeydə alınıb. Avropada da milyonerlərin sayı artıb. UBS bunu ötən il ABŞ dollarının avroya nisbətən dəyər itirməsi ilə izah edir.

Bununla yanaşı, hesabatda qeyd olunur ki, orta rifah səviyyəsi artsa da, sərvət bölgüsündə qeyri-bərabərlik daha da dərinləşib. Orta sərvət göstəricisinin bir çox ölkədə azalması ən varlı təbəqə ilə digər əhali arasındakı fərqin böyüdüyünü göstərir.

UBS araşdırması dünya sərvətinin 92 faizdən çoxunu təmsil edən 56 bazar üzrə hazırlanıb.

30-06-2026, 16:58 42