Ermənistanın Rusiyadakı səfiri Rusiya Xarici İşlər Nazirliyinə (XİN) çağırılıb. Rusiya xarici işlər nazirinin müavini Mixail Qaluzin Ermənistanın Moskvadakı səfiri Qurgen Arsenyanla görüşüb. Görüşdə Ukrayna Prezidenti Volodimir Zelenskinin Ermənistanda Rusiyaya qarşı səsləndirdiyi təhdid mesajlarına görə İrəvana xəbərdarlıq edilib.

Siyasi şərhçi Elçin Abdullayev Kremlin bu addımını Yenicag.az-a şərh edərkən, bunu Ermənistana ünvanlanmış ciddi xəbərdarlıq kimi qiymətləndirib:

“Əslində, Rusiya tərəfinin bu formada reaksiyasını sadəcə diplomatik narazılıq kimi qiymətləndirmək olmaz. Xüsusilə Ermənistanda Paşinyan hakimiyyətinin Qərblə yaxınlaşmağa çalışdığı, Avropa və Ukrayna ilə təmaslarını artırdığı bir dövrdə Kremlin bu cür addımları daha çox siyasi mesaj xarakteri daşıyır. Seçkiöncəsi mərhələdə belə reaksiyalar Ermənistana yönəlmiş bir təzyiq elementidir. Kreml bununla İrəvana həm öz “qırmızı xətlərini” xatırladır, həm də regiondakı təsir imkanlarının hələ də qüvvədə olduğunu nümayiş etdirir. Digər tərəfdən, Moskva Ermənistanla münasibətləri tamamilə qoparmaq niyyətində deyil. Ona görə də hazırkı vəziyyəti daha çox idarəolunan siyasi gərginlik və ya kəskin xəbərdarlıq mesajı kimi qiymətləndirmək olar”.

8-05-2026, 21:49 74