Sumqayıt şəhəri Yaşıldərə yaşayış massivində, Azərbaycanın Milli Qəhrəmanı Əliyar Əliyevin adını daşıyan küçədə yeni salınmış Bələdiyyə Parkının açılışı sakinlər tərəfindən müsbət qarşılanıb.

Sakinlərin Sumqayit.tv-yə verdiyi məlumata görə, uzun illərdir ərazidə yaşayan insanlar, xüsusilə uşaqlar belə bir istirahət məkanının yaradılmasını gözləyirdilər. Hazırda isə yeni park sakinlərin əsas istirahət ünvanlarından birinə çevrilib.

Bildirilib ki, parkın istifadəyə verilməsi ilə yanaşı, ərazidə ən çox narazılıq doğuran problemlərdən biri olan yol məsələsində də müəyyən işlər görülüb. Belə ki, parka qədər uzanan yol hissəsi təmir olunub və bu da sakinlərin rahatlığını xeyli artırıb.

Sakinlər görülən işləri yüksək qiymətləndirərək əməyi keçən hər kəsə təşəkkür ediblər. Bununla yanaşı, onlar parkdan sonrakı yol hissəsinin də təmir olunmasını arzuladıqlarını bildiriblər.

Qeyd edək ki, Yaşıldərə yaşayış massivində həyata keçirilən bu yenilik ərazidə yaşayan uşaqlar və ailələr üçün daha rahat və təhlükəsiz mühit formalaşdırıb.

VİDEO LİNK: Sumqayıtın Yaşıldərə yaşayış massivində yeni salınan Bələdiyyə Parkı sakinlərin sevincinə səbəb olub

11-05-2026, 20:26 96