Sumqayıt şəhərində nəqliyyat infrastrukturunun yenilənməsi və ictimai nəqliyyat sisteminin daha müasir şəkildə təşkili istiqamətində həyata keçirilən tədbirlər davam etdirilir.

Sumqayit.tv xəbər verir ki, son illər şəhərdə sərnişindaşıma xidmətinin keyfiyyətinin artırılması məqsədilə bir sıra layihələr icra olunub. İctimai nəqliyyat sisteminin müasirləşdirilməsi, yeni və komfortlu avtobusların marşrut xətlərinə cəlb edilməsi, sərnişinlərin rahatlığının təmin olunması istiqamətində görülən işlər şəhər sakinləri tərəfindən də müsbət qarşılanır.

Sumqayit.tv xəbər verir ki, həyata keçirilən yeniliklərin davamı olaraq şəhərin müxtəlif ərazilərində yeni müasir avtobus dayanacaqlarının quraşdırılmasına başlanılıb.

Quraşdırılan dayanacaqlar müasir standartlara uyğun şəkildə hazırlanıb. Dayanacaqlarda sərnişinlərin hava şəraitindən qorunması, rahat gözləmə imkanlarının yaradılması və şəhər estetik görünüşünün yaxşılaşdırılması əsas məqsədlərdən biri kimi nəzərdə tutulub.

Məlumata görə, yeni dayanacaqların mərhələli şəkildə şəhərin digər ərazilərində də quraşdırılması planlaşdırılır.

Qeyd edək ki, Sumqayıtda nəqliyyat infrastrukturunun yenilənməsi istiqamətində həyata keçirilən layihələr şəhərdaxili hərəkətin daha rahat və təhlükəsiz təşkili baxımından mühüm əhəmiyyət daşıyır.

11-05-2026, 22:04 93