Azərbaycanda həyata keçirilən sosial mənzil proqramlarında Sumqayıt şəhəri əsas ünvanlardan biri kimi diqqət çəkməyə davam edir.

Sumqayit.tv xəbər verir ki, “Report”un hazırladığı araşdırmada son illər ölkədə mənzil təminatı sahəsində həyata keçirilən layihələrin Sumqayıtda da geniş şəkildə icra olunduğu qeyd edilib. Bildirilib ki, şəhərdə minlərlə ailənin yaşayış şəraitinin yaxşılaşdırılması istiqamətində mühüm addımlar atılıb.

Araşdırmada vurğulanır ki, İpoteka və Kredit Zəmanət Fondunun həyata keçirdiyi “satmaq öhdəliyi ilə kirayə” mexanizmi çərçivəsində Bakı və Abşeronla yanaşı, Sumqayıtda da müxtəlif ünvanlarda vətəndaşlara mənzillər təqdim olunub. Məlumata görə, hazırada Sumqayıt şəhərində 3 fərqli ünvanda kirayə mənzil layihəsi reallaşdırılıb.

Qeyd olunub ki, bu layihələr xüsusilə gənclər və gənc ailələr üçün əlverişli imkanlar yaradır. Uzunmüddətli və sabit ödəniş mexanizmi vətəndaşların mənzil sahibi olmasını daha da asanlaşdırır.

Araşdırmada Mənzil İnşaatı Dövlət Agentliyinin (MİDA) həyata keçirdiyi layihələrə də toxunulub. Bildirilib ki, güzəştli mənzil proqramları şəhərlərdə müasir yaşayış mühitinin formalaşmasına, sosial infrastrukturun inkişafına və urbanizasiya prosesinin daha dayanıqlı şəkildə qurulmasına töhfə verir.

Məqalədə həmçinin Sumqayıt Dövlət Universitetində keçirilən WUF13 məlumatlandırma sessiyasının şəhərin inkişaf və şəhərsalma proseslərində artan rolunu ön plana çıxardığı vurğulanıb.

Mütəxəssislərin fikrincə, Sumqayıt son illərdə həm yaşayış infrastrukturu, həm də sosial layihələrin miqyası baxımından ölkənin inkişaf edən şəhərlərindən birinə çevrilməkdədir.

15-05-2026, 13:55 254