Sumqayıt şəhəri Yaşıl Dərə Metallurq bağlarının 7, 8 və 9-cu sahələrində yaşayan sakinlər uzun müddətdir elektrik enerjisinin verilməsində ciddi problemlər yaşandıqlarını bildirirlər.

Bu barədə Sumqayit.tv redaksiyasına daxil olan müraciətdə qeyd olunur ki, ərazidə demək olar hər gün uzunmüddətli işıq kəsintiləri müşahidə edilir. Sakinlərin sözlərinə görə, bəzi hallarda elektrik enerjisi saatlarla, hətta sutka ərzində verilmir.

Şikayətçilər bildirirlər ki, xüsusilə yağışlı və küləkli hava şəraitində problem daha da kəskinləşir.

“Bir az yağış yağanda və ya külək əsəndə ərazi tamamilə qaranlığa qərq olur. Bu vəziyyət artıq gündəlik problemə çevrilib”, – deyə sakinlər vurğulayıblar.

Sakinlərin iddiasına görə, hal-hazırda da sözügedən ərazidə elektrik enerjisinin verilişində problem yaşanır və bəzi küçələr işıqsız qalıb.

Ərazi sakinləri aidiyyəti qurumlardan problemin araşdırılmasını və elektrik təchizatında yaranan fasilələrin aradan qaldırılmasını xahiş edirlər.

Qarşı tərəfin mövqeyini dərc etməyə hazırıq.

Bu gün, 22:31 44