Azərbaycan Prezidenti İlham Əliyev Amerika Birləşmiş Ştatlarının Prezidenti Donald Trampa ABŞ-ın müstəqilliyinin 250-ci ildönümü münasibətilə təbrik məktubu ünvanlayıb.
Sumqayit.tv xəbər verir ki, məktubda ABŞ-ın 250 il əvvəl müstəqilliyini elan etməsinin dünya tarixində mühüm hadisə olduğu vurğulanıb. Dövlət başçısı ABŞ-ın ötən dövrdə qlobal miqyasda güclü və nüfuzlu dövlətə çevrildiyini qeyd edib, Donald Trampın rəhbərliyi ilə ölkənin beynəlxalq mövqeyinin daha da möhkəmləndiyini bildirib.
Prezident İlham Əliyev Azərbaycan–ABŞ münasibətlərinin son dövrlərdə yüksələn xətlə inkişaf etdiyini vurğulayaraq, fevral ayında imzalanan Strateji Tərəfdaşlıq Xartiyasının iqtisadiyyat, enerji, təhlükəsizlik, rəqəmsal transformasiya və süni intellekt kimi sahələrdə əməkdaşlığın genişlənməsinə töhfə verəcəyinə əminliyini ifadə edib.
Məktubda, həmçinin ABŞ-ın Cənubi Qafqazda sülh prosesinə verdiyi dəstək yüksək qiymətləndirilib. İlham Əliyev ötən il Ağ Evdə keçirilən üçtərəfli görüşün regionda yeni müsbət vəziyyət yaratdığını qeyd edib, Azərbaycan və Ermənistan arasında sülh və ticarət münasibətlərinin formalaşdığını vurğulayıb.
Dövlət başçısı "Trampın Beynəlxalq Sülh və Rifah Marşrutu" layihəsinin Asiya ilə Avropa arasında etibarlı və təhlükəsiz nəqliyyat bağlantısının yaradılmasına xidmət etdiyini bildirərək, ABŞ-ın bu istiqamətdəki dəstəyini xüsusi qeyd edib.
Sonda Prezident İlham Əliyev Donald Trampa möhkəm cansağlığı, fəaliyyətində uğurlar, ABŞ xalqına isə əmin-amanlıq, firavanlıq və rifah arzulayıb.
Bu gün, 12:06
17
