Bəzi qidalar xərçəng riskinin azalmasına kömək edə bilər. Bu barədə ginekoloq Aleksandra Enrikes "El Confidencial" nəşrinə müsahibəsində danışıb.

Həkimin sözlərinə görə, qaragilə antioksidantlarla zəngin olduğundan orqanizmdə xroniki iltihab və sərbəst radikallarla mübarizəyə kömək edir. O bildirib ki, brokoli, gül kələmi və Brüssel kələmi də DNT-ni zədələnmədən qoruyan maddələr ehtiva etdiyinə görə faydalı qidalar sırasındadır.

Aleksandra Enrikes tam taxıllı məhsulların da rasionda yer almasını tövsiyə edib. Onun sözlərinə görə, bu məhsullar hormonlarla əlaqəli bəzi şişlərin yaranma riskinin azalmasına kömək edə bilər.

Mütəxəssis, həmçinin qırmızı lobya, mərci, noxud, kətan toxumu, soya paxlası və yaşıl çayın da gündəlik qidalanmada yer almasını məsləhət görüb. O, yeməklərə sarıkök əlavə etməyin də faydalı ola biləcəyini bildirib.

Qeyd edək ki, sağlam qidalanma xərçəng riskini azalda bilən amillərdən biri hesab olunsa da, heç bir qida təkbaşına xərçəngin qarşısını almır. Mütəxəssislər balanslı qidalanma, fiziki aktivlik və müntəzəm tibbi müayinələrin xəstəliklərin profilaktikasında mühüm rol oynadığını vurğulayırlar.

Bu gün, 00:22 8