Sumqayıt şəhərində ibtidai sinif müəllimlərindən ibarət komandaların iştirakı ilə məktəblərarası “Nə? Harada? Nə zaman?” formatlı intellektual yarış təşkil olunub.

Sumqayit.tv xəbər verir ki, layihə Karyera və Psixologiya Mərkəzi ilə Sumqayıt Heydər Əliyev Mərkəzinin birgə təşkilatçılığı, Abşeron-Xızı Regional Təhsil İdarəsinin dəstəyi ilə Ümummilli Lider Heydər Əliyevin anadan olmasının 103-cü ildönümünə həsr olunub.

Yarışın əsas məqsədinin təhsilin təməlini formalaşdıran ibtidai sinif müəllimlərinin nüfuzunun artırılması, onların fəaliyyətinə diqqətin gücləndirilməsi və öz üzərlərində daha həvəslə çalışmalarına stimul yaradılması olduğu bildirilib.

İntellektual yarışda Sumqayıt üzrə ümumilikdə 32 məktəbin komandası iştirak edib. Komandalar əvvəlcə 3 qrup üzrə mübarizə aparıblar. Hər qrupda ilk 3 yeri tutan komandalar final mərhələsinə vəsiqə qazanıblar.

Final mərhələsinin nəticələrinə əsasən, birinci yeri Polad Həşimov adına 28 nömrəli məktəb, ikinci yeri N.Tusi adına 12 nömrəli məktəb, üçüncü yeri isə 13 nömrəli məktəb tutub.

Qaliblərə diplom və hədiyyələr təqdim olunub, yarışda fəal iştirak edən müəllimlər isə təşəkkürnamələrlə təltif ediliblər.

Tədbirdə çıxış edən müəllimlər yarışın maraqlı və yaddaqalan keçdiyini bildirərək layihənin davamlı olmasının vacibliyini vurğulayıblar.

Qeyd olunub ki, layihənin gələcəkdə digər şəhər və rayonlarda da keçirilməsi nəzərdə tutulur.

Bu gün, 10:08 37