Ali təhsil müəssisələrinin magistratura səviyyəsinə qəbul üzrə iyunun 14-də keçirilmiş ikinci cəhd (təkrar) imtahanının yekun nəticələri elan edilib.

Sumqayit.tv xəbər verir ki, bu barədə Dövlət İmtahan Mərkəzi (DİM) məlumat yayıb.

Bildirilib ki, bakalavrlar yekun imtahan balını DİM-in elektron xidmətləri vasitəsilə öyrənə bilərlər. Nəticələri, həmçinin mobil operatorlar (Azercell, Bakcell və Nar) vasitəsilə "iş nömrəsi"ni 7727 nömrəsinə göndərməklə əldə etmək mümkündür.

Qəbul imtahanında müsabiqə şərtlərini ödəyən bakalavrlar magistratura üzrə ixtisaslaşma seçimi mərhələsinə buraxılacaqlar. İxtisaslaşma seçimi "Magistratura səviyyəsi üzrə ixtisaslaşma seçimi cədvəli" əsasında aparılacaq. Həmin cədvəlin "Magistr" jurnalının növbəti sayında dərc olunacağı bildirilib.

Qeyd edək ki, imtahanın qapalı və kodlaşdırıla bilən açıq tipli tapşırıqlar üzrə nəticələri iyunun 17-də açıqlanmışdı. Hazırda isə xarici dil fənləri üzrə esse tapşırıqlarının nəticələri də əlavə olunmaqla yekun bal təqdim edilib.

İştirakçılar qapalı və kodlaşdırıla bilən tapşırıqlar üzrə maksimum 95, esse tapşırığı üzrə isə 5 bal olmaqla, ümumilikdə 100 bal toplaya bilərlər.

3-07-2026, 14:33 68