“Villa Badam” yaşayış massivində milyonluq ziyanın vurulması işi üzrə məhkəmə prosesi yekunlaşıb.

Sumqayıtda villadan külli miqdarda oğurluq etməkdə təqsirləndirilən Çin vətəndaşları — 44 yaşlı Wei Zhinjian və 34 yaşlı Wei Hongfunun məhkəmə işi başa çatıb.

Sumqayıt Ağır Cinayətlər Məhkəməsinin hökmünə əsasən, Wei Zhinjian 7 il 6 ay, onunla cinayət əlaqəsində olan Wei Hongfu isə 2 il müddətinə azadlıqdan məhrum edilib.

İttihama görə, onlar Sumqayıtdakı villalardan birində yerləşən dəmir seyfi açaraq 134 500 ABŞ dolları, 10 min manat və çoxlu sayda qiymətli qızıl-zinət əşyaları oğurlayaraq zərərçəkənə ümumilikdə 357 194 manat ziyan vurublar.

Məhkəmədə ifadə verən Wei Hongfu bildirib ki, Bakıya işləmək məqsədilə gəliblər və onları bu oğurluğa “Wei He” adlı həmvətənləri təhrik edib. Onun sözlərinə görə, Wei He onların pasportlarını alaraq təzyiq göstərib və oğurluğu həyata keçirməyə məcbur edib. Hadisədən sonra onlara təxminən 80 min ABŞ dolları verilib və Dubaya getmələri tapşırılıb. Lakin aeroportda onlar saxlanılıb.

Zərərçəkən Tofiq Məmmədov (ad-soyad şərti) məhkəmədə bildirib ki, faktiki oğurlanan qızıl-zinət əşyalarının real dəyəri ittiham aktında göstəriləndən daha yüksəkdir:

“Bəzi zinət əşyaları qiymətli idi və onları ‘lom’ qiyməti ilə hesablamaq olmazdı. Mənim evimi onlara kimin göstərdiyini bilmirəm. “Villa Badam”da 170 villa var, həmin vaxt mənim evim kimi işıqsız onlarla villa var idi”.