Sumqayıt şəhərinin 13-cü mikrorayonunda bir il əvvəl baş vermiş partlayışın ildönümü qeyd olunur. Hadisə nəticəsində binada yaşayan 6 nəfər dağıntılar altında qalmış, onlardan biri həyatını itirmişdi.

Partlayışdan sonra təxminən 100 sakin təxliyə edilərək kirayə mənzillərə yerləşdirilmişdi.

Sumqayıt Şəhər İcra Hakimiyyətindən verilən məlumata görə, binanın bir girişində partlayış nəticəsində ciddi ziyan yaranmış və həmin giriş istismar üçün yararsız hesab olunaraq sökülüb. Partlayışdan zərər çəkmiş sakinlərə maddi yardım göstərilib.

Digər iki girişdə yaşayan sakinlər isə müvəqqəti kirayə mənzillərdə yerləşdirilmiş, aparılan texniki qiymətləndirmələrdən sonra artıq öz mənzillərinə qayıdıblar.

İcra hakimiyyətindən bildirilib ki, bütün aidiyyəti tədbirlər partlayışdan sonra dərhal görülüb, təhlükəsizlik təmin edilib və sakinlərin mənzillərinə qaytarılması üçün bütün şərait yaradılıb.