Özəl tibb müəssisələri də onkoloji tibbi xidmət həyata keçirə biləcək.

Sumqayit.tv xəbər verir ki, bununla bağlı məsələ Milli Məclisin bu gün keçirilən iclasında müzakirə olunan “Əhalinin sağlamlığının qorunması haqqında” və “Onkoloji yardım haqqında” qanunlara dəyişiklikdə əksini tapıb.

Məlumata görə, mövcud qanunvericiliyə əsasən, onkoloji tibbi xidmət yalnız ixtisaslaşdırılmış dövlət tibb müəssisələri tərəfindən göstərilirdi və bu xidmətlər dövlət büdcəsi hesabına maliyyələşdirilirdi. Özəl tibb müəssisələrinin bu sahədə fəaliyyəti isə lisenziyadan kənar hesab olunurdu.

Qeyd olunub ki, onkoloji xəstələrin sayının artması və müalicənin yalnız dövlət büdcəsi hesabına aparılması bir sıra hallarda vətəndaşların ölkə xaricinə üz tutmasına səbəb olur. Halbuki, ölkə daxilində müasir avadanlıqlarla təchiz edilmiş və ixtisaslı həkimlərin fəaliyyət göstərdiyi özəl tibb müəssisələri mövcuddur.

Dəyişikliklərə əsasən, “Lisenziyalar və icazələr haqqında” Qanunun tələblərinə uyğun olaraq, yalnız onkoloji yardım üzrə müvafiq lisenziyaya malik özəl tibb müəssisələri bu xidməti göstərə biləcək. Bu isə pasiyentlərin öz istəklərinə uyğun olaraq dövlət və ya özəl tibb müəssisəsində müalicə almaq və həkim seçmək hüququnu təmin edəcək.

Müzakirələrdən sonra qanun layihəsi səsverməyə çıxarılaraq üçüncü oxunuşda qəbul edilib.

13-02-2026, 15:10 42