Sumqayit.tv Oxu.az istinadən xəbər verir ki, Sumqayıt Ağır Cinayətlər Məhkəməsində keçirilən son prosesdə təqsirləndirilən şəxs barəsində hökm elan olunub.

Məhkəmənin qərarına əsasən, M.Şərifov 18 il müddətinə azadlıqdan məhrum edilib.

İttiham materiallarına görə, M.Şərifov Sumqayıt şəhəri, Xəzər bağları yaşayış massivində yaşayan qonşusu, 66 yaşlı Mehparə İmanqulu qızı Ələkbərovanı xüsusi amansızlıqla qətlə yetirməkdə təqsirli bilinib.

İstintaq sənədlərində qeyd olunur ki, hadisədən əvvəl qadının saxladığı toyuqların tələf olması tərəflər arasında mübahisəyə səbəb olub. Mehparə Ələkbərova quşların M.Şərifov tərəfindən zəhərləndiyini iddia edib və bu səbəbdən aralarında ciddi münaqişə yaranıb.

Bildirilib ki, narkotik və spirtli içki asılılığı olan M.Şərifov sərxoş vəziyyətdə qadınla mübahisə edib. Münaqişə zamanı o, Mehparə Ələkbərovanın əlindəki kərkini alaraq onun baş, sifət və bədəninin müxtəlif nahiyələrinə çoxsaylı xəsarətlər yetirib və nəticədə qadın xüsusi amansızlıqla qətlə yetirilib.

Faktla bağlı cinayət işi başlanılıb. Polis əməkdaşlarının keçirdikləri əməliyyat-axtarış tədbirləri nəticəsində M.Şərifov saxlanılaraq istintaqa təhvil verilib.

13-02-2026, 22:22 22