Qayınatasını qətlə yetirməkdə təqsirləndirilən Nurulla Mərdanovun cinayət işi üzrə məhkəmə prosesi yekunlaşıb.

Sumqayit.tv Oxu.az-a istinadən xəbər verir ki, Sumqayıt Ağır Cinayətlər Məhkəməsində keçirilən prosesdə təqsirləndirilən şəxs barəsində hökm elan olunub.

Məhkəmənin qərarına əsasən, N.Mərdanov 16 il müddətinə azadlıqdan məhrum edilib.

İttiham materiallarına görə, 1998-ci il təvəllüdlü Nurulla Mərdanov Sumqayıt şəhərində yerləşən “İbiza” restoranında kababçı kimi çalışıb. O, 2022-ci ildə ailə həyatı qurub və bu nikahdan bir övladı dünyaya gəlib.

Ötən ilin iyun ayında Nurulla Mərdanovla həyat yoldaşı arasında qısqanclıq zəminində mübahisə baş verib. Münaqişə zamanı o, həyat yoldaşını amansızlıqla döyərək xəsarət yetirib və daha sonra evi tərk edib.

Hadisədən xəbər tutan N.Mərdanovun qayınatası Arif Bağıyev vəziyyəti aydınlaşdırmaq məqsədilə onların yaşadığı ünvana gəlsə də, kürəkənini evdə tapa bilməyib. Daha sonra qayınata kürəkəni ilə telefon əlaqəsi saxlayaraq görüşmək istədiyini bildirib.

Sumqayıtda küçədə baş tutan görüş zamanı tərəflər arasında mübahisə yaranıb. Nəticədə Nurulla Mərdanov qayınatası Arif Bağıyevi bıçaqla qətlə yetirib.

Faktla bağlı cinayət işi başlanılıb. Polis əməkdaşlarının keçirdikləri əməliyyat tədbirləri nəticəsində N.Mərdanov saxlanılaraq istintaqa təhvil verilib.

13-02-2026, 22:34 134