Sumqayit.tv-nın Xəzər TV-yə istinadən verdiyi məlumata görə, Sumqayıt şəhər sakini Rahim Bayramov ev almaq adı ilə dələduzluqla üzləşib.
Onun vəkili Gülər Mirzəyevanın sözlərinə görə, Rahim Bayramov mənzil üçün bank vasitəsilə ümumilikdə 126 500 manat vəsait ödəyib. Lakin sonradan nə vəd edilən mənzil təqdim olunub, nə də ödənilən məbləğ geri qaytarılıb.
Məsələ ilə bağlı işə baxan Sumqayıt Şəhər Məhkəməsi iddiaçı Rahim Orucəli oğlu Bayramovun xeyrinə qərar çıxarıb. Qətnaməyə əsasən, borclu tərəf — Sumqayıt şəhər sakini Nazim Səftər oğlu Məlikov icra vərəqəsi üzrə 126 500 manat məbləği ödəməlidir.
Lakin məhkəmə qərarından 4 il keçməsinə baxmayaraq, icra hələ də təmin olunmayıb.
Şikayət olunan Nazim Məlikovla telefon əlaqəsi saxlanılıb.
Mövzu ilə bağlı Ədliyyə Nazirliyi-nin Sumqayıt şəhəri üzrə İcra İdarəsindən bildirilib ki, Nazim Məlikov barəsində araşdırma aparılıb. Qurumdan qeyd olunub ki, işin uzun müddət icra edilməməsi səbəbindən borclu şəxs barəsində ciddi tədbirlər görülüb və bu tədbirlər hazırda da davam etdirilir.
Bildirilir ki, Nazim Məlikovun əmlakına həbs qoyulub və yaxın vaxtlarda daha sərt hüquqi addımların atılması nəzərdə tutulur.
21-02-2026, 08:47
30
