Qadın Təşəbbüsü və Sosial Problemlərin Həllinə Yardım İctimai Birliyinin rəhbəri Zenfira Mustafayeva, məcburi köçkün və qaçqın ailələrinin azad edilən torpaqlara qayıtdıqdan sonra iqtisadi müstəqilliklərini bərpa etmələrinin vacibliyini vurğuladı. O, bildirib ki, bu ailələr öz yurdlarına qayıtdıqdan sonra dövlət qurumlarında, biznes sahələrində və müxtəlif peşələrdə fəaliyyət göstərə biləcək potensiala malikdirlər.
QHT sədri qeyd edib ki, Sumqayıt şəhərində 60 mindən çox məcburi köçkün və qaçqın ailəsi yaşayır: "Qadın Təşəbbüsü və Sosial Problemlərin Həllinə Yardım İctimai Birliyi 25 ildən artıqdır ki, bu xanımlara dəstək göstərir və onlar üçün təlimlər təşkil edir. 2024-cü ildə keçirilən kurslarda 90-a yaxın xanım iştirak edib və onlara kompüter bilikləri, mühasibatlıq, dərzilik, salon işi kimi sahələrdə bacarıqlar qazandırılıb. Kursların sonunda iştirakçılar sertifikatlarla təltif olunub və öz bacarıqlarını inkişaf etdirmək üçün praktik təcrübələr əldə ediblər. Bu xanımların bir çoxu artıq işlə təmin olunub və Məşğulluq Agentliyi tərəfindən avadanlıqla təmin olunacaq. Bu layihələrin məqsədi məcburi köçkün və qaçqın xanımlarının iqtisadi cəhətdən güclənməsini təmin etməkdir ki, bu da həmçinin onların ailələrinin sağlam və müstəqil həyat tərzini qurmalarına kömək edəcək".
Zenfira Mustafayeva bildirib ki, təşkilat, yalnız təlimlərlə məhdudlaşmayıb, həmçinin hüquqi, psixoloji və sosial xidmətlər də təqdim edir. Təşkilatın rəhbəri, bu xidmətlərin, xüsusilə, qaçqın və köçkün qadınların qarşılaşa biləcəkləri hüquqi problemlərin həllinə yönəldildiyini və onların öz hüquqlarını qorumağa imkan yaradacağını vurğulayıb: "Təşkilatın əsas məqsədi məcburi köçkün və qaçqın xanımların cəmiyyətə inteqrasiyasını asanlaşdırmaq, onların öz işlərini qurmağa dəstək olmaq və nəticədə iqtisadi müstəqillik qazanmalarına kömək etməkdir".