Sumqayit.tv xəbər verir ki, “Sumqayıt” basketbol komandası son oyunlarda heyət rotasiyası ilə bağlı çətinliklər yaşayır.

Bu barədə komandanın baş məşqçisi Vadim Kuramşın klubun mətbuat xidmətinə açıqlama verib. O, Azərbaycan Basketbol Liqasının VI turu çərçivəsində “Lənkəran” üzərində 98:94 hesablı qələbəni dəyərləndirərkən komandanın vəziyyətinə toxunub:“Komandamı və doğma şəhərimizi qələbə münasibətilə təbrik edirəm. Uşaqlar ötən turda ‘Sərhədçi’ üzərində qazandıqları qələbədən sonra ritm tutdular. Amma hələ də rotasiya ilə bağlı problemlər yaşayırıq. Amerikalı oyunçu ilə bağlı çatışmazlıq var. Buna baxmayaraq, bütün uşaqlar var gücləri ilə döyüşdülər.”

Kuramşın qələbənin əsas səbəbini isə belə izah edib:“Bu gün qalibiyyətin açarı azlıqda oynayarkən qalib gəlmək istəyi oldu. Çünki digər komandalardan fərqli olaraq, bizim cəmi üç legionerimiz var. Mən onlarla fəxr edirəm. Ümid edirəm ki, qarşıdakı günlərdə millilərlə əlaqədar yaranan fasilə bizə mənfi təsir göstərməyəcək.”

6-11-2025, 21:11 96