"Son 20 ildə ölkəmiz müdafiə və milli təhlükəsizlik sahəsində tarixi dönüş əldə edib. 2005-2025-ci illər ərzində bu sahəyə təxminən 58 milyard manat vəsait yönəldilib. Bunun sayəsində Silahlı Qüvvələrimizin texniki təminatı, şəxsi heyətin hazırlığı və müdafiə sənayemiz tamamilə yeni səviyyəyə yüksəlib. Ən əsası - bu vəsaitlər ərazi bütövlüyümüzün bərpasına, müasir və çevik ordu modelinin qurulmasına xidmət edib".
Sumqayit.tv xəbər verir ki, bunu deputat Səbinə Salmanova Milli Məclisinin Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, İnsan hüquqları, Regional məsələlər komitələrinin birgə iclasında "Azərbaycan Respublikasının 2026-cı il dövlət büdcəsi haqqında" Qanun layihəsinin müzakirəsi zaman deyib.
O bildirib ki, 2026-cı il üçün "Müdafiə və milli təhlükəsizlik" bölməsi üzrə 8 milyard 714 milyon manat vəsait nəzərdə tutulur:
"Bu, əvvəlki illə müqayisədə 318.5 milyon manat çoxdur və ümumi büdcə xərclərinin 21 faizini təşkil edir. Amma hazırda müdafiə sahəsində elmi-tədqiqat və innovasiya istiqamətlərinə ayrılan vəsait ümumi xərclərin bir faizinə belə çatmır. Halbuki bu rəqəm müasir dövrdə daha çox ola bilər. Biz artıq XXI əsrin "intellektual savaşları" dövrünə qədəm qoymuşuq - burada silahın sayından çox, ağlın gücü, texnologiyanın üstünlüyü, süni intellektin tətbiqi həlledici rol oynayır".
"Bu baxımdan təklif edirəm ki, növbəti illərdə müdafiə xərclərinin bir və ya iki faizi elmi-tədqiqat və innovasiyalara, iki və ya üç faizi isə kibermüdafiə, rabitə və kadr hazırlığına yönəldilsin", - deyə deputat vurğulayıb.
7-11-2025, 15:26
82
