Azərbaycan Vəkillər Kollegiyasının sədri Anar Bağırov Vətən müharibəsi iştirakçısı olan vəkillərlə görüş keçirib. Görüşdə Sumqayıt şəhər 1 saylı Vəkil Bürosunun vəkili də təltif olunub.
Sumqayit.tv xəbər verir ki, Vəkillər Kollegiyasının inzibati binasında baş tutan tədbir 8 Noyabr – Zəfər Gününün beşinci ildönümünə həsr olunub.
Kollegiyanın sədri Anar Bağırov çıxışında vəkilləri Zəfər Günü, Dövlət Bayrağı Günü və Konstitusiya Günü münasibətilə təbrik edib, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə Vətən müharibəsində qazanılan tarixi Qələbənin əhəmiyyətindən danışıb.
O vurğulayıb ki, Azərbaycan Ordusunun qəhrəmanlığı nəticəsində ölkəmizin ərazi bütövlüyü və suverenliyi bərpa olunub, hazırda işğaldan azad edilmiş torpaqlarda bərpa-quruculuq işləri davam edir.
Görüşdə Vətən müharibəsində iştirak etmiş vəkillər döyüş xatirələrini bölüşüb, onlara göstərilən diqqət və qayğıya görə dövlətə və Kollegiya rəhbərliyinə təşəkkür ediblər.
Sonda Vətən müharibəsi iştirakçısı olan vəkillərə qiymətli hədiyyələr təqdim olunub.
Qeyd edək ki, təltif olunanlar sırasında Sumqayıt şəhər 1 saylı Vəkil Bürosunun vəkili Məcidov Elman Sanqam oğlu da yer alıb.
7-11-2025, 13:38
76
