Rəqəmsal İnkişaf və Nəqliyyat Nazirliyinin Kollegiyası müntəzəm marşrut xətləri üzrə avtomobil nəqliyyatı xidmətini həyata keçirən nəqliyyat vasitələrinə dair yeni tələbləri təsdiqləyib.

Sumqayit.tv xəbər verir ki, nazir Rəşad Nəbiyevin imzaladığı qərara əsasən, müəyyən edilən tələblər Bakı, Sumqayıt, Gəncə, Naxçıvan, Xankəndi şəhərlərini, eləcə də Abşeron, Ağdam, Şuşa və Laçın rayonlarını əhatə edir. Qaydalar müntəzəm sərnişin daşımalarını həyata keçirən daşıyıcılarla xidmət müqavilələrinin bağlanması üçün konkret texniki standartları müəyyən edir.

Yeni tələblərə əsasən, Sumqayıt şəhərində fəaliyyət göstərən müntəzəm marşrut avtobusları aşağıdakı kriteriyalara cavab verməlidir:

gediş haqqının elektron qaydada ödənilməsi üçün nəzərdə tutulmuş ödəniş aləti ilə təchiz olunmalıdır;

avtobuslarda sərnişin sayğacı quraşdırılmalıdır;

sıxılmış təbii qaz (CNG) və dizel mühərriki ilə işləyən avtobusların yürüş həddi 1 milyon km-dən çox olmamalıdır;

elektrik mühərrikli avtobusların yürüş limiti 1,2 milyon km-dir;

nəqliyyat vasitələrinin buraxılış tarixindən 15 ildən çox zaman keçməməlidir;

elektrik avtobusları təkrar doldurula bilən və ya dəyişdirilə bilən batareyalarla təmin olunmalıdır.

Qərar 2026-cı il yanvarın 1-dən etibarən qüvvəyə minəcək.

Nazirliyin Hüquq şöbəsinə sənədin 3 gün müddətində Hüquqi Aktların Dövlət Reyestrinə təqdim edilməsi tapşırılıb.

17-11-2025, 12:00 221