2026-cı ilin fevral ayında mərkəzi icra hakimiyyəti orqanlarının rəhbərləri tərəfindən şəhər və rayonlarda keçiriləcək vətəndaş qəbullarının cədvəli açıqlanıb. Qəbul görüşləri çərçivəsində Sumqayıt şəhəri də əsas ünvanlardan biri olacaq.

Sumqayit.tv xəbər verir ki, rəsmi cədvələ əsasən fevral ayı ərzində Sumqayıtda üç yüksək vəzifəli şəxs vətəndaşları qəbul edəcək. Qəbul görüşləri saat 10:00-da başlayacaq.

Belə ki, fevralın 5-də Dini Qurumlarla İş üzrə Dövlət Komitəsinin sədri Ramin Məmmədov Sumqayıt şəhərində vətəndaş qəbulu keçirəcək. Qəbul zamanı Sumqayıt, Abşeron və Xızı rayonlarından olan vətəndaşların müraciətləri dinləniləcək.

Fevralın 13-də iqtisadiyyat naziri Mikayıl Cabbarov Sumqayıtda vətəndaşları qəbul edəcək. Bu qəbul Sumqayıt və Abşeron sakinlərini əhatə edəcək.

Ayın sonuna yaxın, fevralın 27-də isə elm və təhsil naziri Emin Əmrullayev Sumqayıt şəhərində qəbul keçirəcək. Qəbulda Sumqayıt, Abşeron, Xızı və Qubadlı rayonlarından olan vətəndaşlar iştirak edə biləcəklər.

Qeyd edək ki, vətəndaş qəbullarında iştirak etmək üçün müraciətlər müvafiq qurumlar tərəfindən əvvəlcədən qeydiyyata alınır və qəbul yalnız qeydiyyatdan keçmiş şəxslər üçün nəzərdə tutulur.

Dünən, 11:29 8