Mədəniyyət Nazirliyi dövlət teatrlarının idarəetmə sistemində köklü dəyişikliklər edərək yeni struktur və ştat cədvəllərini təsdiqləyib.
Sumqayit.tv "Yenisabaha"-a istinadən xəbər verir ki, teatr və teatr fəaliyyəti haqqında” qanunun tələblərinə əsasən, qəbul edilən qərara əsasən, teatrların uzun illərdir əsas yaradıcı siması hesab olunan bədii rəhbər və baş rejissor kimi strateji vəzifələr ləğv olunub.
Yeni əsasnaməyə görə, teatrların fəaliyyəti artıq konkret şəxslər üzərində deyil, ixtisaslaşmış departamentlərin koordinasiyası ilə idarə ediləcək. Nazirlik bu addımı idarəetmədə müasir yanaşmaların tətbiqi, çevikliyin və effektivliyin artırılması ilə izah edir.
Qərar Sumqayıt Dövlət Dram Teatrına da şamil olunub. Belə ki, aparılan struktur dəyişiklikləri nəticəsində teatrın baş rejissoru Firudin Məhərrəmov ştat cədvəlindən çıxarılıb. Bu dəyişiklik Sumqayıt teatr mühitində də geniş müzakirələrə səbəb olub.
Yeni sistemə əsasən, ləğv edilən vəzifələrin funksiyaları Yaradıcılıq, Tərtibat, Maliyyə və Marketinq istiqamətli yeni şöbələr arasında bölüşdürüləcək. Bu departamentlərin yaradılmasında əsas məqsəd teatrların həm bədii keyfiyyətini qorumaq, həm də maliyyə dayanıqlığını və tamaşaçı marağını artırmaqdır.
Qeyd edək ki, analoji dəyişikliklər ölkə üzrə 30-dan çox dövlət teatrını əhatə edir. Yeni idarəetmə modelinin Sumqayıt Dövlət Dram Teatrının repertuarına, yaradıcı mühitinə və tamaşaçı auditoriyasına necə təsir edəcəyi isə yaxın dövrdə aydın olacaq.

Dünən, 14:36 7