Azərbaycanda müxtəlif istiqamətlər üzrə müntəzəm avtobus marşrutları müsabiqəyə təqdim olunur.

Sumqayit.tv xəbər verir ki, bu barədə Azərbaycan Yerüstü Nəqliyyat Agentliyi (AYNA) məlumat yayıb.

Məlumata görə, müsabiqəyə çıxarılan marşrutlar arasında Sumqayıtla birbaşa əlaqəli istiqamətlər də yer alır. Belə ki, Sumqayıt–Yalama, Sumqayıt–İsmayıllı, Sumqayıt–Naftalan, Saatlı–Sumqayıt, Yardımlı–Sumqayıt və Sumqayıt–Yardımlı şəhərlərarası xətləri daşıyıcıların seçimi üçün təqdim olunur.

Bundan başqa, 102, 122, 137, 192, 195, 196, 448, 510 və 512 nömrəli şəhərətrafı marşrutlar da müsabiqə siyahısındadır.

Müsabiqə “Avtomobil nəqliyyatı haqqında” Qanuna və Nazirlər Kabinetinin 3 aprel 2009-cu il tarixli 52 nömrəli qərarı ilə təsdiq edilmiş qaydalara uyğun təşkil edilir. Sənədlər 31 mart 2026-cı il saat 17:00-dək AYNA-da qəbul olunacaq.

Komissiya tərəfindən lotlar üzrə baxış tarixləri də açıqlanıb. Sumqayıt istiqamətlərinin daxil olduğu bir sıra lotlara aprelin 14, 21 və 24-də baxılması planlaşdırılır.

Qeyd edək ki, müsabiqədə əsas avtobuslarla yanaşı, ehtiyat nəqliyyat vasitələrinin də təqdim olunması tələb edilir.

AYNA bildirir ki, şəhərlərarası və şəhərdaxili marşrut xətləri mərhələli şəkildə müsabiqəyə çıxarılır. Məqsəd sərnişindaşıma xidmətlərinin keyfiyyətini, təhlükəsizliyini və rahatlığını artırmaqdır.

3-03-2026, 10:42 93