Martın 5-də Elnarə Akimova tərəfindən Sumqayıt şəhərində növbəti vətəndaş qəbulu təşkil olunub.

Sumqayit.tv xəbər verir ki, görüş deputatın seçicilərlə mütəmadi ünsiyyətinin təmin edilməsi və onların müraciətlərinin dinlənilməsi məqsədilə keçirilən qəbul günləri çərçivəsində baş tutub. 2026-cı ilin mart ayı üçün nəzərdə tutulmuş ilk qəbul günü kimi təşkil edilən qəbul zamanı şəhər sakinləri sosial təminat, məşğulluq, məişət və gündəlik həyatla bağlı qarşılaşdıqları müxtəlif problemlərlə bağlı müraciətlərini deputatın diqqətinə çatdırıblar. Vətəndaşların səsləndirdiyi məsələlər diqqətlə dinlənilib, bir sıra müraciətlər üzrə yerindəcə izahat və hüquqi məsləhətlər verilib. Əlavə araşdırma tələb edən məsələlər isə qeydiyyata alınaraq aidiyyəti qurumlara yönləndirilməsi üçün nəzarətə götürülüb.

Görüş zamanı deputat Elnarə Akimova vətəndaşlarla birbaşa ünsiyyətin onların problemlərinin operativ və səmərəli həllinə mühüm töhfə verdiyini vurğulayıb. O bildirib ki, qəbul zamanı qaldırılan bütün müraciətlər qanunvericiliyin tələblərinə uyğun şəkildə araşdırılacaq, səlahiyyətləri çərçivəsində müvafiq dövlət qurumları ilə əməkdaşlıq edilərək problemlərin həlli istiqamətində zəruri tədbirlər görüləcək.

Sonda qeyd olunub ki, vətəndaş qəbulları seçicilərlə davamlı dialoqun qorunması, onların sosial rifahına təsir edən məsələlərin birbaşa dinlənilməsi və həlli istiqamətində sistemli fəaliyyətin həyata keçirilməsi baxımından mühüm əhəmiyyət daşıyır və bu görüşlər mütəmadi şəkildə davam etdiriləcək.