Azərbaycanın yaddaşına ən ağır faciələrdən biri kimi həkk olunan Azərbaycan Dövlət Neft Akademiyasında (indiki Azərbaycan Dövlət Neft və Sənaye Universiteti) baş vermiş terror aktından 17 il keçir.

Sumqayit.tv xatırladır ki, 2009-cu il aprelin 30-da səhər saatlarında Gürcüstan vətəndaşı, 1980-ci il təvəllüdlü Fərda Qədirov universitetin Bakı şəhərində yerləşən ikinci tədris binasına daxil olaraq silahlı hücum həyata keçirib. O, binanın birinci mərtəbəsindən altıncı mərtəbəsinədək qarşısına çıxan şəxslərə atəş açaraq 12 nəfəri qətlə yetirib, 13 nəfəri isə yaralayıb. Hücumdan sonra Qədirov intihar edib.

İstintaq materiallarına əsasən, hadisəni törədən şəxs erməni xüsusi xidmət orqanlarının sifarişini yerinə yetirib. Onun Gürcüstan vətəndaşı Mardun Qumaşyan adlı erməni ilə əlaqədə olduğu və bu məqsədlə silah və maliyyə dəstəyi aldığı müəyyən edilib.

Qeyd edək ki, faciə zamanı həyatını itirənlər arasında Sumqayıt şəhər sakini, 1980-ci il təvəllüdlü Taleh Məmmədov da olub. Bu hadisə ölkə ictimaiyyətində böyük sarsıntıya səbəb olub və bu gün də ağrısı unudulmur.

Faktla bağlı Cinayət Məcəlləsinin bir neçə maddəsi ilə cinayət işi açılıb, hadisə ilə əlaqədar bir neçə nəfər məsuliyyətə cəlb olunaraq məhkəmə qərarı ilə cəzalandırılıb.

Bu gün terror qurbanlarının xatirəsi ehtiramla yad olunur. 
Allah rəhmət etsin!

Bu gün, 08:57 3