Bu gündən etibarən Azərbaycanda qadınların pensiya yaşı 65 yaş olub. Beləliklə, qadınlar üçün pensiya yaşı kişilərlə eyniləşdirilib.
Sumqayit.tv xəbər verir ki, kişilər üçün pensiya yaşı 2021-ci il iyulun 1-dən etibarən 65 yaş olaraq müəyyən edilib.
Qeyd edək ki, "Əmək pensiyaları haqqında" qanuna əsasən, kişilərin pensiya yaşı 2017-ci il iyulun 1-dən 2021-ci il iyulun 1-dək, qadınların pensiya yaşı isə 2017-ci il iyulun 1-dən 2027-ci il iyulun 1-dək hər il 6 ay artırılıb. Nəticədə, iyulun 1-dən etibarən qadınlar da 65 yaşında yaşa görə əmək pensiyası almaq hüququ qazanırlar.
Qanunvericiliyə əsasən, pensiya yaşına çatmış şəxsin fərdi hesabında toplanmış pensiya kapitalı minimum əmək pensiyasından az olmayan pensiya təminatına imkan verirsə, ona sığorta stajından asılı olmayaraq yaşa görə əmək pensiyası təyin edilir. Bu mümkün olmadıqda isə şəxsin ən azı 25 il sığorta stajı olmalıdır.
Hazırda Azərbaycanda minimum əmək pensiyasının məbləği 320 manat təşkil edir. Yaşa görə əmək pensiyası ömürlük təyin olunur.
Bu gün, 13:03
7
