1999-cu ildən bu günədək Azərbaycan Ordusunun 3 mindən çox hərbi qulluqçusu dünyanın müxtəlif regionlarında keçirilən beynəlxalq sülhməramlı əməliyyatlarda iştirak edib.
Sumqayit.tv xəbər verir ki,bu barədə müdafiə naziri Zakir Həsənov Beynəlxalq Münasibətlərin Təhlili Mərkəzi və Müdafiə Nazirliyinin birgə hazırladığı "Azərbaycan Ordusunun sülhməramlı əməliyyatlarına dair hesabat" üçün yazdığı ön sözdə bildirib.
Nazir qeyd edib ki, Azərbaycan sülhməramlılarının fəaliyyəti xidmət etdikləri beynəlxalq qüvvələrin komandanlığı, müxtəlif dövlətlər və beynəlxalq təşkilatlar tərəfindən daim yüksək qiymətləndirilib.
Onun sözlərinə görə, dünyada baş verən geosiyasi proseslər və müxtəlif regionlarda davam edən münaqişələr sülhməramlı missiyaların əhəmiyyətini daha da artırır.
"Azərbaycan dünya birliyinin və BMT-nin üzvü kimi sülhün qorunmasına və qlobal təhlükəsizliyin təmin olunmasına yönəlmiş təşəbbüsləri dəstəkləyir. Hazırda beynəlxalq sülhün qorunmasına töhfə vermək məqsədilə BMT və NATO-nun müxtəlif əməliyyatlarında Azərbaycan Ordusunun iştirak imkanları araşdırılır", – deyə nazir vurğulayıb.
Zakir Həsənov bildirib ki, sülhməramlı əməliyyatlarda iştirakla bağlı qəbul edilən siyasi qərarlar və Azərbaycan hərbçilərinin peşəkar fəaliyyəti ölkəmizin beynəlxalq nüfuzunun möhkəmlənməsinə, etibarlı tərəfdaş və sülhsevər dövlət kimi tanınmasına mühüm töhfə verib.
Qeyd edək ki, Müdafiə Nazirliyi və Beynəlxalq Münasibətlərin Təhlili Mərkəzinin hazırladığı hesabatda silahlı münaqişələrdən sonrakı dövrdə sabitliyin bərpası, atəşkəs rejiminin qorunması və uzunmüddətli sülhün təmin edilməsində sülhməramlı əməliyyatların rolu geniş təhlil olunur. Üç fəsildən ibarət tədqiqatda həm sülhməramlı əməliyyatların nəzəri əsasları, həm də Azərbaycan Ordusunun bu sahədə topladığı təcrübə ətraflı təqdim edilir.
2-07-2026, 14:05
54
