Bakı–Xırdalan–Sumqayıt dəmiryol xəttində təhlükəsizliyin artırılması məqsədilə yeni qaydalar təsdiqlənib.
Sumqayit.tv xəbər verir ki, Azərbaycan Respublikasının Rəqəmsal İnkişaf və Nəqliyyat Nazirliyinin Kollegiyası “Dəmir yolunun təhlükəsizlik zonasının müvəqqəti istismar Qaydaları”nı təsdiq edib.
Qərar “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində Bakı–Xırdalan–Sumqayıt və Bakı–Pirşağı–Sumqayıt dəmiryol xətlərinin təkmilləşdirilməsi, eləcə də bir sıra digər xətlərin bərpasını əhatə edir.
Qaydalara əsasən, dəmir yolunun təhlükəsizlik zonası relslərin hər iki tərəfində 11 metr məsafəni əhatə edəcək. Bu ərazilərdə hündürlüyü 2,20 metrdən çox olmayan qoruyucu çəpərlər və torlar quraşdırılacaq, avtomobil yolları ilə kəsişmələrdə isə təhlükəsiz keçidlər təşkil olunacaq.
Bundan başqa, təhlükəsizlik zonası videomüşahidə sistemləri ilə təchiz ediləcək və ərazi 24 saat nəzarətdə saxlanılacaq.
Yeni qaydalara əsasən, təhlükəsizlik zonasında digər təyinatlı bina və tikililərin inşasına icazə verilməyəcək.
Bu gün, 11:46
10
