Sumqayıt Apellyasiya Məhkəməsində vəzifəli şəxsin səlahiyyətlərini mənimsəmədə təqsirləndirilən Zamiq Əsədovun (adı, soyadı şərtidir) barəsindəki qərardan verilən apellyasiya şikayətinə baxılıb.

Sumqayit.tv xəbər verir ki, hakim Ruhiyyə Əsgərovanın sədrliyi ilə keçirilən məhkəmə iclasında qərar elan olunub.

Qərara əsasən, Zamiq Əsədovun apellyasiya şikayəti təmin edilməyib.

İttihama görə, Zamiq Əsədov ünvanlı dövlət sosial yardımı almaq istəyən şəxslərə köməklik göstərmək adı ilə onların adına formal iş yerlərinin rəsmiləşdirilməsini təşkil edib.

Məhkəmə materiallarında qeyd olunur ki, 2020-ci ilin yanvar-noyabr ayları ərzində 298 nəfərin adına faktiki əmək münasibəti olmadan əmək müqavilələri rəsmiləşdirilib. Həmin şəxslərin guya Xaçmaz rayonunda kənd təsərrüfatı sahəsində fəhlə kimi çalışmaları barədə məlumatlar elektron sistemə daxil edilib.

İstintaqın hesablamasına əsasən, bu yolla həmin şəxslərin ailələrinə ümumilikdə 578 989,26 manat ünvanlı dövlət sosial yardımı təyin edilməsinə şərait yaradılıb.

Zamiq Əsədov məhkəmədə ittihamı qismən qəbul edib və bəzi hallarla bağlı fərqli mövqe nümayiş etdirib.

Qeyd edək ki, Xaçmaz Rayon Məhkəməsinin hökmü ilə Zamiq Əsədov 6 il 6 ay müddətinə azadlıqdan məhrum edilib. Həmçinin dövlətə dəymiş 578 959,26 manat maddi zərərin tutulması barədə qərar qəbul olunub.

Sumqayıt Apellyasiya Məhkəməsi isə apellyasiya şikayətini təmin etməyib.//Pravda.az

Bu gün, 12:16 9