2026–2027-ci tədris ili üçün ali təhsil müəssisələrinin bakalavriat səviyyəsinə qəbul zamanı I ixtisas qrupu üzrə dövlət sifarişi ilə ayrılan plan yerlərinin sayı açıqlanıb.

Sumqayit.tv xəbər verir ki, bu barədə məlumat “Abituriyent” jurnalının 4-cü sayında dərc olunub.

Məlumata görə, I ixtisas qrupu üzrə ümumilikdə 16 265 dövlət sifarişli plan yeri ayrılıb. Abituriyentlər həmin yerlər üzrə müsabiqədə iştirak etməklə təhsili dövlət hesabına davam etdirmək imkanı əldə edə bilərlər.

Müsabiqə şərtləri necə olacaq?

I ixtisas qrupu üzrə həm dövlət sifarişi, həm də ödənişli əsaslarla keçirilən müsabiqəyə ümumi balı 200-dən, qəbul imtahanının ikinci mərhələsi üzrə balı isə 100-dən az olmayan abituriyentlər buraxılacaqlar.

Riyaziyyat, fizika və kompüter elmləri ixtisaslarını seçmək istəyənlər üçün isə tələblər fərqlidir. Bu ixtisaslar üzrə müsabiqəyə ümumi balı 250-dən, ikinci mərhələ üzrə balı 100-dən az olmayan abituriyentlər buraxılacaqlar.

Bəzi ixtisaslarda keçid tələbi daha aşağıdır

Meliorasiya mühəndisliyi, texnologiya müəllimliyi, ekologiya mühəndisliyi, kompüter mühəndisliyi, qida mühəndisliyi, elektrik və elektronika mühəndisliyi, informasiya texnologiyaları, logistika və nəqliyyat texnologiyaları mühəndisliyi, radiotexnika və telekommunikasiya mühəndisliyi ixtisaslarının ödənişli əsaslarla ayrılmış yerləri üzrə müsabiqəyə ümumi balı 150-dən, ikinci mərhələ üzrə balı 50-dən az olmayan abituriyentlər buraxılacaqlar.

Aqromühəndislik, aqronomluq, balıqçılıq, meşəçilik, şərabçılıq, torpaqşünaslıq və aqrokimya, yerquruluşu və daşınmaz əmlakın kadastrı, zoomühəndislik ixtisasları üzrə isə həm dövlət sifarişi, həm də ödənişli əsaslarla qəbul müsabiqəsində iştirak üçün ümumi balın 150-dən, ikinci mərhələ üzrə balın isə 50-dən az olmaması tələb olunur.

İxtisas seçimi nə vaxt başlayır?

Abituriyentlərin ən çox diqqət etməli olduğu məqamlardan biri də ixtisas seçiminin tarixidir.

İxtisas seçimi avqustun 12-dən 19-dək internet vasitəsilə həyata keçiriləcək.

Bu müddət ərzində abituriyentlər topladıqları bala, seçmək istədikləri ixtisasa və dövlət sifarişi üzrə plan yerlərinə uyğun olaraq ixtisaslarını müəyyənləşdirəcəklər.

Qeyd: İxtisas seçimi zamanı yalnız bal göstəricilərini deyil, seçilən ixtisas üzrə dövlət sifarişi və ödənişli plan yerlərinin sayını, həmçinin müsabiqə şərtlərini də diqqətlə nəzərə almaq vacibdir.

Bu gün, 11:26 8