Sumqayıt Dövlət Universiteti (SDU) ilə SOCAR-ın “Azərikimya” İstehsalat Birliyi arasında əməkdaşlığın yeni mərhələsi ilə bağlı mühüm müzakirələr aparılıb.
Sumqayit.tv xəbər verir ki, SDU-nun rektoru, professor Nurəli Yusifbəylinin rəhbərlik etdiyi nümayəndə heyəti SOCAR “Azərikimya” İstehsalat Birliyində işgüzar görüş keçirib.
Görüş zamanı universitet-sənaye əməkdaşlığının genişləndirilməsi, kimya və neft-kimya sənayesi üçün yüksəkixtisaslı mühəndis kadrların hazırlanması, tələbələrin istehsalat təcrübələrinin artırılması və elmi-tədqiqat fəaliyyətinin real istehsalat ehtiyacları ilə uyğunlaşdırılması məsələləri müzakirə olunub.
Rektor Nurəli Yusifbəyli universitet-sənaye tərəfdaşlığının insan kapitalının inkişafı baxımından mühüm əhəmiyyət daşıdığını bildirib. O, SDU-da mühəndislik təhsilinin müasir tələblərə uyğunlaşdırılması və tələbələrin praktiki hazırlığının gücləndirilməsi istiqamətində görülən işlər barədə məlumat verib.
Görüşdə tələbələrin istehsalat müəssisələrində təcrübə keçməsi, birgə elmi və tətbiqi layihələrin həyata keçirilməsi, “Azərikimya”nın aparıcı mütəxəssislərinin universitetdə ustad dərslərinə cəlb olunması və gələcək kadr hazırlığı ilə bağlı uzunmüddətli əməkdaşlıq mexanizmlərinin yaradılması da müzakirə edilib.
“Azərikimya”nın baş direktoru Elnur Məmmədli isə müəssisədə rəqəmsal transformasiya, avtomatlaşdırma və yeni texnologiyaların tətbiqinin müasir bilik və bacarıqlara malik mühəndislərə tələbatı artırdığını vurğulayıb.
Tərəflər tələbələrin innovasiya və startap layihələrinə cəlb olunması, enerji, kimya və mühəndislik ixtisasları üzrə təhsil alan gənclərin istehsalat təcrübələrinin genişləndirilməsi məsələlərinə də diqqət yetiriblər.
Görüşün sonunda əməkdaşlığın yeni mərhələyə keçirilməsi məqsədilə çərçivə əməkdaşlıq sənədinin hazırlanması və imzalanması barədə razılıq əldə olunub.
Bildirilir ki, yeni əməkdaşlıq ali təhsil, elm, innovasiya və istehsalat arasında əlaqələrin gücləndirilməsinə və sənayenin tələblərinə uyğun kadr hazırlığının inkişafına xidmət edəcək.
Bu gün, 10:55
49
