Sumqayıtda ixtisas seçimi ilə bağlı abituriyentlərə ödənişsiz məsləhət xidməti göstəriləcək.
Sumqayit.tv xəbər verir ki, Dövlət İmtahan Mərkəzinin (DİM) məlumatına əsasən, Sumqayıt Dövlət Universitetində (SDU) abituriyentlər üçün Məsləhət Mərkəzi fəaliyyətə başlayıb.
Abituriyentlər burada ixtisas seçimi, elektron ərizənin doldurulması və müsabiqə şərtləri ilə bağlı ödənişsiz məsləhət ala bilərlər.
SDU-da fəaliyyət göstərən DİM-in Məsləhət Mərkəzi şənbə və bazar günləri də daxil olmaqla hər gün saat 10:00-dan 18:00-dək abituriyentlərin müraciətlərini qəbul edir.
Mərkəz Sumqayıt Dövlət Universitetinin əsas korpusunun 123-cü otağında yerləşir.
Qeyd edək ki, abituriyentlər ixtisas seçimi ilə bağlı digər universitetlərdə və DİM-in regional bölmələrində yaradılan məsləhət mərkəzlərinə də müraciət edə bilərlər. Ölkənin 50-dən çox bölgəsində də abituriyentlərə ixtisas seçimi və elektron ərizənin doldurulması ilə bağlı ödənişsiz kömək göstəriləcək.
Ali təhsil müəssisələrinə ixtisas seçimi 12–19 avqust tarixlərində aparılacaq.
Bu gün, 16:53
7
