Sumqayıt şəhərinin Corat bağları ərazisində sakinlər uzun müddətdir davam edən su problemindən narazıdırlar.

Sumqayit.tv xəbər verir ki, Vüsal Allahyarov və Məhəmməd Nadir Rzayev küçələrinin sakinlərinin sözlərinə görə, ərazidə xüsusilə yay aylarında su qıtlığı yaşanır.

Sakinlər bildirirlər ki, problemin həlli ilə bağlı dəfələrlə aidiyyəti qurumlara müraciət etsələr də, vəziyyət dəyişməyib. Su çatışmazlığı səbəbindən bəzi ailələr gündəlik tələbatlarını qarşılamaq üçün müxtəlif üsullardan istifadə etməli olurlar.

Sakinlərdən biri bildirib ki, iyun ayından etibarən ərazidə su problemi daha da kəskinləşib:

“78 yaşım var, küçələrdən su daşıyıram. Maşını su daşımaqdan xarab etmişəm. Qonşudan su götürürük, o da çətin vəziyyətdə qalır”.

Digər sakin isə problemin yeni olmadığını deyib. Onun sözlərinə görə, 2003-cü ildən ərazidə yaşayan sakinlər hər il yay aylarında oxşar problemlə üzləşirlər.

Sakinlər aidiyyəti qurumlardan ərazidə su təchizatının yaxşılaşdırılmasını və problemin uzunmüddətli həllini istəyirlər.

Məsələ ilə bağlı aidiyyəti qurumların mövqeyini dərc etməyə hazırıq.

Ətraflı:Baku.tv

Bu gün, 10:45 6