İran hakimiyyəti ölkənin keçmiş ali rəhbəri Əli Xamenei ilə vida mərasimləri ərəfəsində yüngül cinayətlərə görə məhkum olunmuş ən azı 850 nəfərin azadlığa buraxılması barədə qərar qəbul edib.

Sumqayit.tv xəbər verir ki, bu barədə "Tasnim" agentliyinə açıqlamasında İranın Pul Kompensasiyalarının Ödənilməsi üzrə Xalq Qərargahının qəyyumlar şurasının sədri Seyid Əsədullah Culai məlumat verib.

Onun sözlərinə görə, ölkənin bütün 31 əyalətindən təqdim olunan işlərə baxıldıqdan sonra maliyyə öhdəliklərinə görə həbsdə olan 520 nəfərin, nikah müqavilələri və aliment ödənişləri ilə bağlı məhkum edilmiş daha 330 nəfərin azadlığa buraxılması qərara alınıb.

Məlumata görə, Əli Xamenei ilə vida mərasimi iyulun 3-də Tehranda başlayacaq. Tədbirdə 30-dan çox ölkədən yüksək səviyyəli nümayəndə heyətlərinin iştirakı gözlənilir.

İyulun 4–5-də Xameneinin nəşi Tehrandakı Mosalla kompleksində ictimai vida üçün saxlanılacaq. İyulun 6-da paytaxtda matəm yürüşü keçiriləcək, daha sonra cənazə Qum şəhərinə aparılacaq. Yas mərasimlərinin ardından Əli Xameneinin iyulun 9-da doğulduğu Məşhəd şəhərində dəfn olunması planlaşdırılır.

1-07-2026, 16:59 35