Sumqayıt şəhərinin Hacı Zeynalabdin qəsəbəsi ərazisində ağacəkmə aksiyası təşkil olunub.
Sumqayit.tv xəbər verir ki, tədbir abadlıq və yaşıllaşdırma tədbirləri çərçivəsində, Bakı–Quba magistral yolunun qəsəbədən keçən hissəsində salınmış yeni park zonasında keçirilib.
Aksiyada Milli Məclisin deputatı Elnarə Akimova, Sumqayıt Şəhər İcra Hakimiyyətinin əməkdaşları, qəsəbə nümayəndəliyi, bələdiyyə və digər qurumların təmsilçiləri iştirak ediblər.
Tədbir zamanı park ərazisində müxtəlif növ ağac tingləri əkilib, mövcud yaşıllıq sahələrinə qulluq göstərilib. Bildirilib ki, aksiyanın məqsədi ekoloji tarazlığın qorunması, yaşıllıq sahələrinin genişləndirilməsi və ərazi sakinləri üçün daha əlverişli mühitin yaradılmasıdır.
Qeyd olunub ki, qəsəbədə abadlıq və yaşıllaşdırma istiqamətində tədbirlər mərhələli şəkildə davam etdirilir.