Sumqayıt şəhərində ağacların qanunsuz kəsilməsi nəticəsində yaşıllıqlara ciddi ziyan vurulduğu müəyyən edilib.
Sumqayit.tv xəbər verir ki, Dövlət Ekoloji Təhlükəsizlik Xidmətinin məlumatına görə, Bakı, Sumqayıt şəhərləri və Abşeron rayonu ərazisində aparılan araşdırmalar zamanı ağacların qanunsuz kəsilməsi ilə bağlı faktlar aşkarlanıb.
Məlumata əsasən, Sumqayıt şəhərinin 4-cü məhəlləsində ağacların qanunsuz kəsilməsi nəticəsində yaşıllıqlara ziyan dəydiyi müəyyən olunub.
Bakı şəhəri Xətai rayonu və Abşeron rayonunun Masazır qəsəbəsində aşkarlanan digər faktlarla birlikdə yaşıllıqlara vurulan ümumi ziyanın məbləği 71 940 manat təşkil edib.
Dövlət Ekoloji Təhlükəsizlik Xidməti bildirib ki, hər bir fakt üzrə yaşıllıqlara dəymiş ziyanın məbləği cinayət tərkibi yaratdığından, məsələyə hüquqi qiymət verilməsi üçün toplanmış materiallar hüquq-mühafizə orqanlarına göndərilib.
Sumqayıtda 4-cü məhəllədəki ağacların qanunsuz kəsilməsi ilə bağlı araşdırmanın nəticələri barədə əlavə məlumat veriləcəyi təqdirdə, onu da təqdim edəcəyik.