Abşeron rayonunda 1989-cu il təvəllüdlü Nicat ailə münaqişəsi zəminində yaranan mübahisə zamanı həyat yoldaşı Fərqanəyə (adlar şərtidir – red.) xəsarət yetirib. 

Demokrat.az-ın əldə etdiyi məlumata görə, 6 yanvar 2025-ci ildə baş verib. 

Nicat həmin gün saat 17 radələrində ailə üzvləri ilə birlikdə yaşadığı Abşeron rayonu, Məmmədli kəndində yerləşən fərdi yaşayış evində arvadı Fərqanənin onun mobil telefon vasitəsi ilə danışdığına görə irad bildirərkən həmin səbəbdən ailə daxili münasibətlər zəminində aralarında yaranmış narazılıqla əlaqədar mübahisə edib. 

Həmin mübahisə əsnasında Nicat əsəbiləşərək Fərqanənin üzərinə hücum edib, qəsdən əl, yumruq zərbələri ilə onun sifət, baş və bədəninin müxtəlif nahiyələrinə vurub. Ona müxtəlif dərəcəli bədən xəsarətləri yetirib. 

Hadisəni törədən Nicatın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib. 

Cinayət işi üzrə təqsirləndirilən şəxs qismində ifadə verən Nicat ona elan olunmuş ittiham üzrə özünü təqsirli bilib. 

O, ifadəsində göstərib ki, onun Fərqanə ilə 2014-cü ildə rəsmi olaraq qurduqları nikahdan üç övladları var: 

“Biz birlikdə Abşeron rayonu, Məmmədli kəndində yerləşən fərdi yaşayış evində yaşayırıq. Hadisə günü evdə olan zaman arvadım Fərqanə mənim dayım qızı Nazilə ilə mesajlaşdığımı görərək, yersiz qısqanclıqlar etdi, mübahisə yaratdı. Mən əsəblərimi cilovlaya bilməyərək, yumruqla Fərqanənin sifət nahiyəsindən vuraraq onu döydüm”. 

Bu cinayət işinə Abşeron Rayon Məhkəməsində baxılıb. 

Məhkəmənin hökmü ilə Nicat 6 ay müddətə azadlığın məhdudlaşdırılması cəzasına məhkum edilib.

Təqsirləndirilən şəxsin üzərinə Sumqayıt şəhər Probasiya Şöbəsinə məlumat vermədən Abşeron rayonunun hüdudlarından kənara çıxmamaq, saat 23:00-dan növbəti gün, saat 07:00-dək yaşadığı Abşeron rayonu, Məmmədli qəsəbəsi, M.Müşviq küçəsində yerləşən fərdi yaşayış evini tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, məhkəmə qərarı olmadan yaşayış yerini dəyişdirməmək, (müalicəsi ilə əlaqədar olaraq xəstəxanada olması istisna olmaqla) cəzanın icrasına nəzarət edən orqanı iş yerinin dəyişdirilməsi və ya işə düzəlməsi barədə əvvəlcədən məlumatlandırmaq vəzifələri qoyulub.