Sumqayıt şəhərində fəaliyyət göstərən “Liman Klinikası” qüsurlu cərrahi əməliyyata görə pasiyentə təzminat ödəməyə məhkum edilib.

Sumqayit.tv Qafqazinfoya istinadən xəbər verir ki, bu barədə məhkəmə qərar qəbul edib.

İş materiallarına görə, Nuridə Zülfüqarova 2024-cü ildə klinikada burun əməliyyatı keçirib. Əməliyyatdan sonra onun sol gözündə çəplik yaranıb. Aparılan məhkəmə-tibb ekspertizası əməliyyatın qüsurlu icra edildiyini təsdiqləyib.

İddiaçı tərəf maddi və mənəvi zərərə görə ümumilikdə 50 min manat təzminat tələb etsə də, Sumqayıt Şəhər Məhkəməsi iddianı qismən təmin edib.

Qərara əsasən, “Liman Qrup” MMC Nuridə Zülfüqarovaya 28 574 manat maddi, 3 000 manat isə mənəvi zərər əvəzi ödəməlidir. Əməliyyatı həyata keçirən cərrah Əfqan Ağagülova qarşı irəli sürülən iddia isə təmin olunmayıb. Məhkəmə bildirib ki, həkim klinikanın əməkdaşı olduğundan hüquqi məsuliyyəti işəgötürən daşıyır.

Qeyd edək ki, qərar sonradan apellyasiya və ali instansiya məhkəmələri tərəfindən də qüvvədə saxlanılıb.

Bu gün, 15:22 11