Baş Prokurorluğun sorğusu əsasında Monteneqro məhkəməsi Azərbaycan vətəndaşı Hidayət Nemət oğlu Süleymanovun ölkəmizə ekstradisiya edilməsinə razılıq verib.
Sumqayit.tv xəbər verir ki,Baş Prokurorluqdan verilən məlumata görə, Monteneqro Ədliyyə Nazirliyinə göndərilən sorğu və beynəlxalq prosedurlara uyğun təqdim olunan sənədlər əsasında aparılan danışıqlardan sonra Podqoritsa Ali Məhkəməsi Hidayət Süleymanovun sadələşdirilmiş ekstradisiya proseduru ilə Azərbaycana təhvil verilməsi barədə qərar qəbul edib.
Bildirilib ki, Sumqayıt Şəhər Polis İdarəsində istintaqı aparılan cinayət işi üzrə Hidayət Süleymanovun özünü vəzifəli şəxs kimi təqdim edərək zərərçəkmişə ev tikintisi və dövlət qurumlarından bütün icazələrin alınacağı barədə yalan vədlər verməklə külli miqdarda maddi ziyan vurduğu və dələduzluq etdiyi müəyyən edilib.
Bu səbəbdən onun barəsində Cinayət Məcəlləsinin müvafiq maddəsi ilə təqsirləndirilən şəxs qismində qərar qəbul olunub. İstintaqdan yayındığı üçün İnterpolun Bakıdakı Milli Mərkəzi Bürosu vasitəsilə beynəlxalq axtarış elan edilən Hidayət Süleymanov keçirilən əməliyyat-axtarış tədbirləri nəticəsində Monteneqro ərazisində saxlanılıb.
Hazırda onun Azərbaycana gətirilməsi istiqamətində Ədliyyə Nazirliyinin Penitensiar Xidməti tərəfindən zəruri tədbirlər həyata keçirilir.
3-07-2026, 22:43
63
