Azərbaycan Respublikasının Qida Təhlükəsizliyi Agentliyi (AQTA) ölkədə heyvan kəsiminin müasir tələblərə uyğunlaşdırılması, müasir kəsim məntəqələrinin təşkil olunması və qanunsuz heyvan kəsimi fəaliyyətinin qarşısının alınması istiqamətində nəzarət tədbirlərini davam etdirir.

Nəzarət tədbirləri çərçivəsində Agentlik müfəttişləri tərəfindən İsmayıllı Rayon Polis İdarəsinin əməkdaşları ilə birgə keçirilən reyd zamanı rayonun Yuxarıbaş kəndində Həmzəyev Rüstəm Qaraş oğluna məxsus fərdi yaşayış evinin həyətyanı sahəsində 4 ədəd at başı, 15 ədəd at ayağı, 4 hissəyə bölünmüş 1 baş at cəmdəyi, sümükdən ayrılmış at əti və sümükləri aşkar olunub. Müayinələrin aparılması üçün nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim olunub. Araşdırmalar davam etdirilir.
Agentlik bir daha qanunsuz heyvan kəsimi fəaliyyəti ilə məşğul olan şəxsləri qanunvericiliyin tələblərinə əməl etməyə və qanunazidd fəaliyyətdən yayınmağa çağırır.