Dünən millimizin hücumçusu Mahir Emrelinin çıxış etdiyi "Legiya" Avropa Liqasının C qrupunda "Lester"lə qarşılaşıb. Varşava təmsilçisinin start heyətində meydana çıxan Emreli görüşün 31-ci dəqiqəsində baxımlı qola imza ataraq, yekunda komandasının qələbəsini rəsmiləşdirib. Emreli görüşdən sonra uefa.com saytına açıqlama verib: "Anam topu aldığım anda mümkün qədər tez qol vurmağımı istəyir. Bu üzdən, topu ayağımda bir müddət saxladığım üçün razı qaldığını düşünmürəm. Futbolda artıq favorit yoxdur. Hər şey sənin psixoloji yanaşmandan asılıdır. Oyundan əvvəl dedim ki, bu oyundan ekzotik bir tətil kimi zövq alaq. Çünki belə bir yaxşı komandaya qarşı və belə bir atmosferdə oynamaq fantastikadır. Biz bunu bacardıq. İki oyundan sonra 6 xalımız var. Bunun bir yuxu olduğunu düşünə bilərsən. Amma bu, həqiqətən də baş verdi".