Azərbaycanda yumurta bazarında son günlər müşahidə olunan qiymət enişi diqqət çəkir. Bir neçə ay əvvəl bahalaşan məhsul hazırda əks tendensiya nümayiş etdirir. Mütəxəssislər hesab edirlər ki, yay aylarında tələbatın azalması və bazarda məhsul bolluğu qiymətlərin sabit qalmasına, hətta daha da ucuzlaşmasına səbəb ola bilər.

Sumqayit.tv "Kaspi" qəzetinin məqaləsini təqdim edir.

İqtisadçı-ekspert Xalid Kərimli bildirib ki, qiymətlərin aşağı düşməsinin əsas səbəbi tələbatın azalması deyil, bazarda təklifin tələbi üstələməsidir. Onun sözlərinə görə, isti hava şəraiti yumurtanın saxlanılması ilə bağlı riskləri artırdığı üçün istehsalçılar məhsulu daha aşağı qiymətə satmağa üstünlük verirlər. Ekspert xəbərdarlıq edib ki, uzunmüddətli ucuzlaşma istehsalçıların zərərlə işləməsinə, gələcəkdə isə istehsalın azalaraq qiymətlərin yenidən bahalaşmasına səbəb ola bilər.

Azərbaycan Quş əti, Yumurta İstehsalçıları və İxracatçıları Assosiasiyasının İdarə Heyətinin sədri Mürvət Həsənli isə bildirib ki, hazırda ölkədə yumurta istehsalı daxili tələbatı xeyli üstələyir. Onun sözlərinə görə, fərdi təsərrüfatlarda məhsuldarlığın artması, sənaye müəssisələrinin istehsalı genişləndirməsi, ixracın zəifləməsi və məktəblərin bağlanması nəticəsində tələbatın azalması qiymətlərin enməsinə təsir göstərib.

M.Həsənli qeyd edib ki, yay aylarında yumurtanın qiyməti bəzi hallarda 10-12 qəpiyə qədər enə bilər. Bununla yanaşı, o bildirib ki, bu vəziyyət uzunmüddətli olmayacaq və sentyabr ayından etibarən bazarda qiymətlərin yenidən

tarazlaşacağı gözlənilir.

Assosiasiya sədrinin sözlərinə görə, hazırda bir ədəd yumurtanın orta maya dəyəri təxminən 12 qəpikdir. Ölkədə gündəlik istehlak təxminən 4 milyon ədəd olduğu halda, istehsal 6 milyon ədədə yaxınlaşır ki, bu da bazarda məhsul bolluğu yaradaraq qiymətlərin aşağı düşməsinə səbəb olur.

Bu gün, 16:12 24