Azərbaycanda məsafədən kreditləşmə qaydalarına edilən dəyişikliklər vətəndaşların maliyyə təhlükəsizliyinin gücləndirilməsinə və kiberdələduzluq risklərinin azaldılmasına xidmət edəcək.

Sumqayit.tv xəbər verir ki, bunu bank eksperti Emin Kərimov Ajans.az-a deyib.

Ekspertin sözlərinə görə, yeni mexanizm vətəndaşlara onlayn kredit götürülməsinə könüllü məhdudiyyət qoymaq, istədikləri vaxt bu funksiyanı aktivləşdirmək və ya deaktiv etmək imkanı verəcək. Bu isə şəxsin xəbəri olmadan onun adına kredit rəsmiləşdirilməsi riskini əhəmiyyətli dərəcədə azaldacaq.

Emin Kərimov bildirib ki, məsafədən verilən kreditlər üzrə tətbiq olunacaq 2 saat və 24 saatlıq gözləmə müddətləri də vətəndaşların tələsik qərar verməsinin qarşısını alacaq. Onun sözlərinə görə, kredit müraciəti barədə məlumat alan şəxs zərurət yarandıqda prosesi vaxtında dayandıra biləcək.

Ekspert hesab edir ki, yeni qaydalar həm banklar, həm də müştərilər üçün müsbət nəticələr verəcək. Kiberdələduzluq hallarının azalması bankların reputasiya riskini aşağı salacaq, müştərilər isə rəqəmsal kredit xidmətlərindən daha təhlükəsiz istifadə edə biləcəklər.

Bununla yanaşı, o qeyd edib ki, sistem istifadəyə verildikdən sonra yarana biləcək ehtiyaclara uyğun olaraq əlavə təhlükəsizlik mexanizmlərinin tətbiqi də mümkündür.

Emin Kərimov vətəndaşlara saxta keçidlərə daxil olmamağı, sosial şəbəkələrdə yayılan şübhəli kredit təkliflərinə inanmamağı, Azərbaycan Mərkəzi Bankının təhlükəsizlik tövsiyələri ilə tanış olmağı və şübhəli hallarla qarşılaşdıqda dərhal banka və aidiyyəti qurumlara müraciət etməyi tövsiyə edib.

1-07-2026, 15:52 46